يا جزاير يا العاصمة سومة قيمتك عظيمة
حبك في قلبي ديما الى يوم الدين
فسدوك لي مالهم قيمة وكيلهم المتينفسدوا بلاد سيدي تعلبي عبد الرحمن يا حبابي
مدينة الشهيد الابي و الاوليا الصالحين
حمر اللحية يا قرابين و سيدي محمد بوقبرين
قولو لي يا سامعين ريحة البهجة وين ؟
قولو لي يا سامعين ولاد العاصمة وين ؟
من كل جهة جاك الماشي
الزحف الريفي جاب غاشي
الحياء و الحرمة ما بقاتش
قل الإيمان و الدين
وين المرمى و الشواشي خيطانها مدليين
ما بقاتش بنة رمضان لا عيد لا موسم كي زمان
التقليد غموه يا اخوان بدعوا طبايع اخرين
تبدل الحبق بالريحان حصراه على الياسمين
وين القفاطن و المجبود و طراز الحرير مفقود
وينهم خرازين الجلود وين هم النقاشين
وين صانع سروج العود وين هم الرسامين
قولولي يا سامعين ريحة البهجة وين
قولو لي يا سامعين ولاد العاصمة وين
وين االسفاري و الجلسات وين الشياخ و المسمعات
التقديم بالزغرتات و الكحل بو زندين
وين القصايد و القصات وين هم المداحين
وين فضيلة الدزيرية العنقة و الفخارجية
تيتيش و الزرناجية عادوا قاع منسيين
قسنطيني بو التسلية زيدولو الفنانين
وين سنجي بابا سالم سنجاق طبول و محارم
و غواشي عليه ملايم مادابنا ندوب سنين
غابت النية يا فاهم راح داك الوقت الزين
قولولي يا سامعين ريحة البهجة وين
قولولي يا سامعين ولاد العاصمة وين
ما تعرف حد في الحراش وليد لوساندي مابقاش
حتى في القبة ما فراش ماترى معروف بالعيد
في العناصر ما تبطاش لا تبكي يا مسكين
الحامة في ترييبة سالومبي وزيد العقيبة
في قلبي كل حبيبة غلبت ريحة الوالدين
باب الواد و القصيبة البنة دارت جنحين
باب الجديد و سوسطارة الابيار سكالة طقارة
بوزريعة و زغارة وبوفريزي زين الزين
فسد كل شي يا خسارة سقسوا ناس سنطوجين
قولو لي يا سامعي ريحة البهجة وين؟
قولولي يا سامعين ولاد العاصمة وين؟
اه يا الرحلة المحانة دالخبر ما عجبتي جنا
الرويبة و الرغاية و درغانة عادوا قاع مطرفين
شوف البهجة غضبانة و حيوطها مذبالين
انتبهوا ماصار للغراب ياك في المشية تلفلوا الحساب
لمة عن الزين تلهذاب الحمامة سود العين
كي معناتو المتنجة من عند السابقين
صلوا يا ناس على الرسول حبيب الله خيار الفحول
بن عبد الله سيد البتول فاطمة أم الحسنين
يشفع فينا يوم الهول حنا و الوالدين
نختم نظمي بدو المقال
بحمد الله المتعال و الصلاة على سيد الرجال
الزكي طه الأمين
عبد المجيد مسكود قال ولد الحامة مبين
قولو لي يا سامعين ريحة البهجة وين؟
قولو لي يا سامعين ولاد العاصمة وين؟
